العـــــافية.................

العـــــافية

ومديتن شرايين العشق دوبيت
على شبر الصبر فيني
بتاوق في السنين بى عين
بتنكر في الشعاع عيني
فيا مستوطنه البين بين
تقاقيب بالأمل قادت
شردتا معا الرهاب زادت
ركن في العشم أعضاي
وروح لي الرجعه ما فيني
فشن يجدي الشرود يا بال ؟
ما بجدي الشرود يا بال
وكت متسورك طيفا !
على عضمك جمر تنهال
تجي وتمرق على كيفا
فلا حترب عليك موال
ولا كتم الجفير سيفا
أهي البتقدمك للموت
تخونا ترجعك قيفه
وتملا جراب سكاتك صوت
اذا لاقا السحاب هيفا
دروبا القاسيه ما بتنتما
ما تعشم شتاك صيفا
دروب ستفتا شانا التوه
مسافر و الدليل نسام
أنا و رفقاي قلب مفقوه
و حزمة فرحه بقجه
زوادة ألفين عام
إياهو الشوق مرق شفقان
هداااك الشوق .. مرق شفقان
حبس قبلتنا من قدام
وسافرنا...
بل سافرنا فوق التيه
زرقن فوقنا رمش الطيف
فيا زامل دبارتك كيف
أظن وادي الصبر غرقان
غرقان لا مفر غرقان
هجم فوق السحابه الكب
و اسيتا و شمختا نزيف
و سافرنا...
نقص زادنا السنين زادت
و لا ضنب الدريب رقا
نحلم بالقبل عادت
صحينا اللهفه نتوقا
فيا الفتر الجرايدو نحاس
سممع عودنا انعصر طقا
أبشر باب هلاكنا اتحلا
و الضلل ضهرنا الفاس
وقع والحال هدو انشقا
فيا العافيه الحقينا خلاس
صررا الحيل وشيي ونقا
وقبييل كمين قالولي ناس
لو تبني مواجعك بى فرحك
تنساهو الساس
وانا ساس وجعاتي بعاف الطوب
بقعد مقلوب..
يملاها اللحظه هوان وكروب
خايف بى ضحكه يزول و ينداس
يا العافيه أجيك من سعن الشوق
أتقطر كيف و سعاده وروق
تبري الوسواس !
أنا ما قتليك يا بنيه بروق
في سطر احزانك ما بنحوق
ألقاك سليتي علي كراس..!!
وانا ما قتليك شيليهو الدم
وافديبو دموعك عند الغم
أنا كم قتليك يا العافيه وكم
الاك باريتي قطار الهم
وانا جاري وراك لا ساق لا راس
مكلوف و ملجم بالإحساس
لا.لاحق الهم لا الدرب انتم
لا دقت فيني بلاك أجراس
ومديتن شرايين العشق دوباي
على شبر الصبر ضاق بي
صرختا من الرهاب يا ري
رجع حس المنادي رهاب
فيا مخلوقه من طين الوهم و الشوق
يمين ما فضلن أعصاب؟؟
نضب بحر العشق شقيت
حجر موسى انبجس وانساب
و جادلتا الصبر آمن.. الصبر امن
شحد مني الصبر تيراب
فيا العافيه الزمن ضهاب
ورحكي اتدلي في الحاضر
جززم حلم العزول كضاب
أكان بسلخني من عودك
انا الرصيت وجودك طاب
علي ى كسر الزمن بتتق
ورود سمد جذورا عذاب
بلاك ما نسوى يا عافيه
بلا درعك أكيد ننصاب
ف أوعاك تزعلي و تمشي..!
معاك اتبسمي و أمشي
ولو نشهق وراك دراب
أريت حس القصيد و اصل
هدا الدلق الدوايه خطاب
سلام يا العافيه علك طيبه
نورقبي العشق ما طاب
ولاني مكلفك بالرد
هوي يا العافيه علك طيبه
هوي يا الطيبه عللك عااااافيه..؟