موسوعة الشعر الحلمنــتـــيـشـــــــى 2

المويـــــــــة

بسم الله .. فتحت الباب
وجمب الباب وقفت شوية في الشارع
وباب جيرانا كان مفتوح وظاهر انو زول طالع
وخلف الباب لمحت التوب
بلعت الريق .. لأني كتير بعرف التوب
وجوة التوب لقيت الزول
وظاهر انو دة المحبوب
معاه الجردل المليان
أكيد الموية مقطوعة
حرام والله ألف حرام
حرام الزول يشيل جردل
ويقطع ميل عشان حمام
حرام والله الف حرام
عليكم الله شوفوها
وعشان عينيها ساعدوها
وعشان محبوبتي مابتقدر
تشيل الموية في جردل
عليكم الله شوفوها
مبهدلة كيف مع الجردل
تشيل حبة وتخت نفسا
وتخت حبة وتشيل نفسا
وتخاف من توبا يتبلبل
وتاخد لفة الشارع
وكل الشافا يتبهدل
عليكم الله شوفوها
معذبة كيف مع الجردل
حرام ياموية الف حرام
كرهت الموية من البلف حتي الدش
ومن بابور مياه الحلة
حتي الهيئة
والماسورة
والنافورة
والصهريج
وموية النيل
وموية الزير
وخرطوش كابي في برميل
وحتي الغيمة لما تشيل
عليكم الله شوفوها
معذبة كيف مع الجردل
تشيل حبة وتخت نفسا
وتخت حبة وتشيل نفسا
وبلدنا النايمة ليها سنين
تشبع فينا بالمغصة
وعيون نيلنا النبع من فوق
بتتفرج علي المغصة
وغيوم بلدي المشت من فوق
بتنزل وين ؟؟؟
بتنزل في كروش نجسا
ومطر بلدي النزل من فوق
بينزل وين ؟؟
بينزل فوق جناين سيدي يسقيها
وبينزل فوق عصافير الهوي السكنت
جناين سيدي يرويها
ومطر بلدي النزل من فوق
حينزل يوم
ونيل بلدي المرق من ضو
حيمرح يوم
وغيم بلدي الشرد ياناس
حيرجع يوم
وبت بلدي البكت في يوم
وضاقت وجعة الجردل








الفووووووووووول

رهيب
يا حبيب الشعب يا انتاج بلادي
الله ما احلاك بالجبنة او بالزبادي
فيك سحر غير عادي
انت القدر والحبيب رهيب والله رهيب
في مناسباتنا العديدة
دائما مشكل حضور
في السمايات والمآتم
في العرس والطهور
يا الكل يوم معانا
في العشاء والفطور
عنك ما بنتخلى انت القسمة والنصيب
رهيب والله رهيب
نحنا البيك همنا
وانت سبب أذانا
في البيت والمطاعم
شايلين الصحانة
يا الساقينا موية
في الشتاء والسخانة
يا مسمار بطنا
يا أجمل حبيب
يا ود عم الفاليوم
وجودك مهم في البيت
وفي كل المحافل
أصبحت ذائع الصيت
الله ما أحلاك بالبصل والزيت
من ما ناكلك انت
نكوس العنقريب
رهيب والله رهيب
أصلي ولد بلدنا ما جابوك بالمطار
فيك فيتامين مغذي
زي السمك والخضار
وحاتك انت طاعم
لو بالملح والشمار
إن شاء الله تكون فطورنا
في الجنة ام همبريب
رهيب والله رهيب
يا النبتة العجيبة وصفك تعدى الخيال
بتقوم في أي حتة
في الرمال والجبال
وانت سبب هزائم
المريخ والهلال
ديل راقدين جنائز
ناقصم النحيب






في درب الريد


كم شاققت واتفولحت كم غنيت
كم مقلبت كم ضحكت كم بكيت
وكنت الفارس المنصور
أنا الشبّكت خط العرض وخط الطول
أنا الهباش أنا النهاش
أنا الختري
أصيد الهاوي شاقي الجو
واصيد الأرضي والبحري
أنوع في مطايب الصيد
أصيد البحبى والبجـري
مخازن فُل نكات بالكوم
مهذبة للعفيف وعديـل
مكهربة للبحومو الليل
شباب ورياش ورقة ولين
وخفة دم وقلة دين
دموع تمساح
تبكي الزينة والقاسين
غزال الجـن
دون ما يدري قلبو يحن
أرمّي حبالي في دربو وأقيف قدام
أمثل دور حميل مسكين
ويبدأ سـلام وراهو كلام
وكيف الحال وكيف عاملين
سلام يا أجمل الحلوين
سلام يا ناس ويا أناناس
صباح الورد والياسمين
وتسمع هااي
وتسمع كيييييف
وهمسة شوق وكسرة عين
وبعد شوية بيتكم ويـن
وبعد أيام
وييييين ليك مدة مشتاقين
ومشتاقين توصل شوشو للسكين
ويجي الشاكوش
يصنف شوشو في الارشيـف
وتبدأ القصة في التكرار
وكل عويل بدايتو هزار
يزين للفراش النار
وهاك ياصيد وجاك ياصيد
وفي ذات يوم نسايمو تهب
مكندش بي دعاش الرب
طريت الصيد
وشالني الشوق على سكة جِـدَيْ الريل
مدردح ماني راجي دليل
مسلح بي الخفيف وتقيل
مدى النيران يصيب النملة
ويتصاعد يصيد الفيل
وقولة تيت
جات الصيدة وجه جديد
عيونا تقول صباح العيد
بسيماتا ... تضوي الثورة والحلفايا
تدي الباقي لي باريس
وناس الكبكبة السبقوني رقدو القش
عيون زاغت ، رجول خارت
قلوب وقفت ، رؤوس طارت
مدحرجة في درب تاجوج
وكت ما بعومو شن وداهم يتشابو ويصارعو الموج
وجيتك يا صباح العيد
أنا الهباش أنا النهاش أنا الختري
ويادوب ما بديت بالبسمة قبل أقدم أوراقي
صباح الورد ما تميتا
سحبت إيدا .. صرت عينا .. لفتت جيدا .. قالت ... بِـسْ
تبسي كديسة يا تاجوج
عاملة عيونك الحلوات
أنا اب شنبات تقول لي بِـسْ
كما كُنتْ .. انسحاب تكتيكي لو ينفع
كحلت يمين لقيت شامتين
كحلت شمال لقيت وِسوِسْ
ومن يوم داك حردت الصيد
محل ما أقبِّـل أسمع ... بِـسْ













في درب الريد


كم شاققت واتفولحت كم غنيت
كم مقلبت كم ضحكت كم بكيت
وكنت الفارس المنصور
أنا الشبّكت خط العرض وخط الطول
أنا الهباش أنا النهاش
أنا الختري
أصيد الهاوي شاقي الجو
واصيد الأرضي والبحري
أنوع في مطايب الصيد
أصيد البحبى والبجـري
مخازن فُل نكات بالكوم
مهذبة للعفيف وعديـل
مكهربة للبحومو الليل
شباب ورياش ورقة ولين
وخفة دم وقلة دين
دموع تمساح
تبكي الزينة والقاسين
غزال الجـن
دون ما يدري قلبو يحن
أرمّي حبالي في دربو وأقيف قدام
أمثل دور حميل مسكين
ويبدأ سـلام وراهو كلام
وكيف الحال وكيف عاملين
سلام يا أجمل الحلوين
سلام يا ناس ويا أناناس
صباح الورد والياسمين
وتسمع هااي
وتسمع كيييييف
وهمسة شوق وكسرة عين
وبعد شوية بيتكم ويـن
وبعد أيام
وييييين ليك مدة مشتاقين
ومشتاقين توصل شوشو للسكين
ويجي الشاكوش
يصنف شوشو في الارشيـف
وتبدأ القصة في التكرار
وكل عويل بدايتو هزار
يزين للفراش النار
وهاك ياصيد وجاك ياصيد
وفي ذات يوم نسايمو تهب
مكندش بي دعاش الرب
طريت الصيد
وشالني الشوق على سكة جِـدَيْ الريل
مدردح ماني راجي دليل
مسلح بي الخفيف وتقيل
مدى النيران يصيب النملة
ويتصاعد يصيد الفيل
وقولة تيت
جات الصيدة وجه جديد
عيونا تقول صباح العيد
بسيماتا ... تضوي الثورة والحلفايا
تدي الباقي لي باريس
وناس الكبكبة السبقوني رقدو القش
عيون زاغت ، رجول خارت
قلوب وقفت ، رؤوس طارت
مدحرجة في درب تاجوج
وكت ما بعومو شن وداهم يتشابو ويصارعو الموج
وجيتك يا صباح العيد
أنا الهباش أنا النهاش أنا الختري
ويادوب ما بديت بالبسمة قبل أقدم أوراقي
صباح الورد ما تميتا
سحبت إيدا .. صرت عينا .. لفتت جيدا .. قالت ... بِـسْ
تبسي كديسة يا تاجوج
عاملة عيونك الحلوات
أنا اب شنبات تقول لي بِـسْ
كما كُنتْ .. انسحاب تكتيكي لو ينفع
كحلت يمين لقيت شامتين
كحلت شمال لقيت وِسوِسْ
ومن يوم داك حردت الصيد
محل ما أقبِّـل أسمع ... بِـسْ

























الشريط ((الشاكوش))

في الليلة ديك القصة ذاتها بقت عليك

يا عبدو وأدوك الشريط

يوم قولنا ليك أنضم معاها وكلّما

أبيت تسمع كلامنا وبقيت لميض

وقلته أحسن أكون تقيل أنا ما جميل

وبقيت تقيل لامن سقوك موية الغسيل

وجيت تنطط زي زمان وتباري بقعور الشجر

كايس كراسي الخيزران ..

وقعدته يا زينة الرجال.. كهربجي قال

رفعوا الستار والبت تجي ومرات تقيف

ومعاها يا زول ولداً حريف

والوقفة كانت وقفة ولف

صاحبنا بالاحساس عرف

سألته والناس كلّموك

ووقعته في شارع الزلط

تبكي وتجعّر والعيون اتورّمت

ويد القميص ضهر القميص كم القميص

حتى الفنيلة اتشرّطت

يا عبدو عيب

قوم يلا صلي على الحبيب

الواطه صبحت دايرين ننوم

يا أخوانّا لأ أنا عايز أموت أقع البحر

يا عبدو عيب

الدنيا حر .. والموية بتسخّن عليك

ثلاثة ساعات زولنا يسب ويكيل

ودموعو سايلات بالكفوف

وشرايطو تلمع في الكتوف

بقى فيلسوف

في علاقة بين يوم السبت وعين الحسود؟!

ومقارنات بين الجهل والجمال!!

وسوء الإختيار

قال شينة قال ...!

قال شينة قولنا كلام صحيح

وخطيبها زاتو ولد قبيح

بس ياخي قوم الواطة صبحت دايرين ننوم

قام تاني جاب سيرة البحر

وقام تاني جاب سيرة البحر















سكينـــــــــة


خبريني يا سكينة ..!!
وانا الرومانسي في هذي المدينة
مالى ارى بالصد قلبي تلبَِعين
كوني حنينة يا سكينة مرة
خليني انداح ليك باشعاري الرزينة
اوهكذا فيمن هواك مُكسراً
تنفيه ثم تشوكشين؟
لا يا سكينة
رفقاً باحساسي الدفين
انا قد هجرت الحب زمناً غابراً
واتيت الآن نحوك استكين
قصدت وجهك حيث طعم الفخفخينا
يا جارة مصقولة الاشتات بيض
وشفايف مرسومة بالمسطرينة
فلتمنحيني بالمسارقة نظرة
ودعى التكشر نحو نظراتي الحزينة
ما زال راسي كله متورم
من اثر شاكوش بازمان لعينة
والآن مطرقة بايدك تحملين
لكنني سندانة لن تنزوي
راسي سيقوى كلما تتشرسين
فالحب داء يا سكينة فاعلمي
عبثاً نحاول درأه بالبنسلين
هيهات بالدكتور يشفى عاشق
او بالتمرجي او حبوب كلوركين
كوني دوائي يا سكينة وافقى
لا تسمعي العزال وقول الحافدين
كوني علاجي يا سكينة ترفقي
بكديسة الشعر التي غابت سنينا
عودي الي لكي تعود كديستي
فكديستي اصلاً متيمة بكي
أو فاسالى عنها لكي تتأكدين
يخبرك من شهد القوافي انها
كنزار قباني الذي لو تذكرين
ذَرف الحروف مكسراً ومدمِّعاً
في عشق بلقيس الجميلة والحنينة
يا شهرزادي في المدينة كلها
قد كنت قبلك معضلاً وسمينا
فأنا الآن اراني واهن
وسعت بناطليني قميصي والفلينة
امضى نهارى عابساً ومزهللاً
عيناي احمرت وليتك تعلمين
بوحي الى ايا سكينة بهمسة
من صوتك الشادي كعزف المندلين
او يا سكينة بكرة بمشى وبنتحر
وتبوري انتى تقولي يا ريت لو رضينا















الفيكس


حاجة عجيبة ودنيا تنسّي

ناس اغتربت تمشي المانيا

تمشي اليابان ونيوجيرسي

حاجة عجيبة وجات بالعكس

من الصين وللسودان

الجكس اغترب وباع الفيكس

واحدين قالوا جونا هنا

لأنو هناك حرارة الطقس

واحد قال بكين بالنص

للسوق العربي رماهم بوكس

وميه الميه بايركس

وبايركسنا كمان بايركس

السودان ضاع وضح النهار

من غير ما لبس

والشوارع دقداق تفتل دركسون

وتحل جربوكس

ومن الصحافة زلط وللخرطوم بالعكس

تقيف مشرور وتهتز زي البترول

وما يفضالك كرسي

نهارك ضاع من تصبح لامن تمسي

ركشه هنا وركشه هناك وللصالح العام

أحالوا التكسي ..

الدفار جاك وهاك يا كوراك

تصل عرقان وقميصك وسخان

وحالتك يخسي

راسك زي سخّان يغلي غليان

وما يساوي الفلس



















عنجليييييييزي


كل ما أقبّل وأعاين

ألقى عينيك جات في mine

حاجة very good

حاجة fine

يا suger مصنع كنانة

يا flour مالية البطانة

إنتِ fantastic banana

إنتِ my eyes رتينة

إنتِ where is مابتجينا

إنتِ عينيك فيها light

إنتِ شعرك dark night

إنتِ طبعك كولو right

إنتِ my heart إنتِ نورو

إنتِ my love البدورو

عايز أشوفك more tomorow

 عايز أشوفكmore tomorow



















احاسيس مبرمج كمبيوتر

ليــه يبقا بيناتنــــــــا الزعـــــــــل *** ما كنا أحلى من العســــــــــــــــــــل
احساسنا مربوط من زمــــــان *** بي (داتا كيبــــل) متصـــــــــــــــــــــــل
والكلمة (ويرلس) والعيـــــــون *** ب(الانفــــــــــرا رد) تتصــــــــــــــــــل
ما كنــــــت متخيـــــــل أكــــــــون *** في يوم مطــــــارد بال(هاكـــــــــــر)
خشيتــــــــي رغــم انو القليــــــب *** (باسويردو) أقــــــوى من الحجـــــر
نزلتي (فايل) كــــــان غـــــــريب *** والفيهو كـــــــــان (سيســــتم إرور)
لو حتى (نورتون) ما ســـــــــــأل *** يمكن يكــــــــون (فايروس) خطـــــر
ما بنســـى يوم (فرمطتي) لـــــي *** احساســــــــي في لمح البصــــــــــــر
و(سطبتي) في جـــــواي هــــواك *** (إي اكس إي) ويــــــــن المفـــــــــــر