بت صباحيه.......................

بت صباحيه

وشك زي صباح العيد

وعود نخل الشمال عودك

منو البقدر يلوم بالريد

إذا أصبحتا ميرودك

كتف خيل الضجر بسمك

بقيت أتسمى مريودك

هبش فيني السكات حسك

رقص حس القصيد طربان

طلق في الهجسه واقودك

فما أبهاك

وما أصفاك

صفا النيل من صفا خدودك

اريت بعد القدم ما انشال

إذا عمري المشا يعودك

بت زي غرقة الدرويش

تقطر من عيونا ألق

تسيد في الحنايا الشوق

تمارن في الهجيره شفق

ترد الروح بعد تغرق

كما عاث في نفسنا الشوم

تسيل بهجة و بخور ودعاش

تباريها الخلايا صبق

دخلتي على الأرض بى وين

يا دهشة رواية الزين

وسر حصن سفينة نوح

بعد موج الودار صفق

دخلتي على الأرض بى وين

محاوطه بى الحواري العين

أظن باب الجنان مفتوح

عشان باب الشعور يندق

عيونك هوشة المطره ام بروق وسيول

وجيدك ما عناهو الريل

وكت فصل عليهو الطول

لقيت إيدك عليها رطب

رجف من فاطرك المعسول

شهق بال الضمير تاجوج

حرد جن القصيد القول

فما معقول

يكون موج طلتك زلزال

يحت كل الصبق في البال

يحت كل الصفق في البال

يرد عود القلب مفتول

رجيتك بس قطارك كم تمادى و أخر الجيه

رجيت و الدم دميرة نيل

و كان نفسك مراكبيه

و مليانه القوافي صهيل

ايا الكاتله الرجت ديه

زرعتك في حشاي شحه

وفوق بحري البجيب وبشيل

كان اسمك معديه

ضايرتا الفؤاد شانك

ورح خشي الدروب حيه

عشان ترمد خشوم الليل

معاك يا بت صباحيه

وتروق كل الخيول في الدم

واسور حوش حضورك نم

واظلك غيمه ورديه