أمدرمان "عاصمة الذكريات"

أمدرمان "عاصمة الذكريات"

يا ام درمان خبارك ناخجه قلبي

وراويه الأننه و الآلام دمينا

ختة ساقي فيك كيفن تميلي

على نفق الحكايات ترسي بينا

دروبك زي كأن منشاها روحي

تخم في الذكريات و تودي لينا

سنيني الفتا كان ناسيها عندك

زي الفتها الحين مستكينه

الالاف المواقف ساجره لبي

(حبيبه) تلاوي في البسمات حزينه

كضاب البقول إنك أماكن

ومجرم كل بقول إنك مدينه

فإنتي الدنيا فى لحظة كمالا

يا إنسانه ضحاكه وحنينه

فيا ام درمان خبارك ناخجه قلبي

وحسي معاكي مقروش بالخواطر

تراب سككك موسم بى خطانا

كأن لامالنا في عبك دفاتر

أكت مضبوح و إيدك قالده إيدي

نتلتا يميني بارحتك مسافر

فما كان عارفو دا الشارع البودي

على فقدك و يسو في البال مجازر

ايا ام درمان مرقتا انا من حشاكي

الاقيك في حشاي دوله و بنادر؟؟؟

وكل ناسك مساسقين في عضامي . .

ودمي يسيل يعبيلك محابر

كفاك يا ام بتفتل حيل جناها

و تصنع من فتات افكارو شاعر

كفاك تمليني بالدمعه و تعبي

وتسجني فكري في بحرك بواخر

فيا ام درمان أيا أعذب حبيبه

يا معزوفه بى أصوات صحابي

اسواقك مساجدك و كل حاجه

هديل حارسين دوام الدنيا بابي

فتتك كان ولا بى كيفي عارفه

ولو بى كيفي كان اهديك شبابي

عشان البيننا من نيل و ابتسامه

مشتت هسه بين شكي وصوابي .. تلميني و إذا تمديلي غفوه

بحنس في المنام طرشان ومابي

مشلهت حالي من لحظة لمحتك

بتفرد جبهتك قولة حبابي

شراييني بتقلد في الأزقه

وتنده فيني تستجدي انسكابي

فكيف يا ام در تنادي و كاشفه إسمي

أيا ولدي المخللق من ترابي

ودايره النوم يناضمني و اناضمو

ولساي لسه زازاي في ضهابي

فيا ام در مان خبارك ناخجه حسي

وقافله القبلتين جواي تعسسي

بناديك أقرعي الاشجان تفضل

ولا ظنيتك آمدرمان تحسي

ولا ظنيت طيوفك بارحه دربي .. ترفرف وين مراسي نفوسنا ترسي

أنا الخلاني ناضمتك قصايد

وفوق الوافر استحكمبي جرسي

مواجع فرقتك تاورني ضيما

و اتوهط .. و كان الماضي كرسي

فما كان الا حاربتا المفارح

مسافر دومي بين يوم داك و هسي

ولاك قصرتي في كبدي انفردتي

تربتي حين .. و حين حينين تقرصي

فيا ام در بعد كل ما كان و كنتا

سألتا الله قدر ما هاجني لبسي

تدومي منيفة الوجهات مهابه

وتصبحي بالأمان فوق ليهو تمسي

. . . .

هتان حمد النيل