منجم اندهاش

بنسج معاك جمام و بيت رمله ووطنِ
ونضحك قدر ضحك الرشاش
يا زوله منجم اندهاش
ظابط عليك في الطله ميقات الفرح
يا وعد بى حضن الدعاش
آمال بتلعن فرقتك
كمل تقاسيما الغباش
راجياكي مدن البال
لحظة غياب الضيم
نتلاقى بى امر العشق
قبال يوارونا الطشاش

. . . .

بت يا غزاله و فركه
يا سيسبانه وضي
بت يا حنان اماتنا
في قولتن جد لي
فوق نقعة البقاره
شبال سحاب فوق صي
دامرقه يا مشكوكه
نخله وجلاده وحق
زورينا زورة الري
أدي القصيد الفكره
وأدي العطيش القاش
يا زوله منجم إندهاش

. . . .

بت منضره وحفله ورهاب وحفير
بت كترت بى ريدا
فوق لي قلبنا الجير
راجين نشوفك فينا
زي همبريب بى إيدو
رقص قرى الجرجير
الدنيا إيه غير ذاتك
الروح بلاكي تعير
تسرف نفسنا الآهه
طعم الضحك مرمير
بت يا غزاله وفركه
حفله ورهاب وحفير
لحظة ملاقاتك عجب
بى الشوفه بنقرب نطير
فوقنا السعاده تمد
مد البصر بتمد
وإتمدد الخوف إنكماش
يا زوله منجم اندهاش

. . . .

يا ناس بلاد بى غادي
مارق عليكم هسه
دخلة أذون القوم
طار فوق دربكم حيلي
فرت طيور النوم
دايرنكم في الروح
جراري حس مردوم
سوو لينا إشاره
خميس طويره معبا
بينا القطر اتدبا
والشوق جبل مردوم

. . . .

يا ناس بلاد بى غادي
ناديتني ناديتا
لا سمعتا لا سمعت نداي
الريح براها 
القادره تتلفح غناي
ورونا كيفن حالكم
وروني كيفن حالي
وانا هسه جاي
التوه ستفتا الزمن
حققبتا بقجة إشتهاي
لي داري ناوي العوده
كل السنين بيناتنا
مد السعد ممدوده
لى قعده ضل يوم باكر
لا بد ناوي العوده
مهما الدريب اتكاجر
نفخ جضومو السوده
لابد ناوي العوده
هناك حكاوي الريده
راجيانا شان تتعاش
يا زوله منجم إندهاش

. . . .

يا قهوة النضم المجرتق 
بى أحاسيس الحنين
نحنا .. ب نهاجر ليك
بى دروب بى هناك
نركب خيول الشوق
ونقتات أمل نلقاك
ونتلافاك
يا بت سفينة نوح
ونستناك
لو داس سفرنا الروح
لو ضيمي زفا الخاطر
لو ردا ما مجروح
وبوعد ضراك بى زوره
ونديكي باب السوح
كان تزورينا
بالسمته تملينا
تقري الغرق فينا
نقول .. لى الفرحه طلينا
ونعلن بى صفانا الهادي وادينا
نبشر كل أهالينا
ونكتب بينا 
آمال في جدار البوح
إذا فاض العشم موال
وإذا غرق بحرنا النوح