بتعرفى؟ .. وانا ما عارف كيف ؟؟ ..

بتعرفى؟ .. وانا ما عارف كيف ؟؟ ..
بس ما تستبعدى فى يوم ما
إتوكل وأقولك مشتاقين
ما هو الإحساس الجواى ليك لا حولاااااااااا ..
بعرفو شديد قدر إيش .. كده
كده بفضحنى وتقريهو ببساطه شديده على العينين ..
وأنا أسى محتار فينى شديد
قدامك وعارفك سامعانى ..
ممحوقه حروف اللغه جواى ..
ما عارف أبدأ الحكى من وين ؟
مستغربه فينى وما عارفه ؟؟
يازوله ولا يهمك عادى ..
أهو نحنا الإتنين ما عارفين ..
تقريبا وفى الغالب ياخى
واحشانى كأنو بنتعارف ..
سلمت عليك من جوه الروح ..
إزيك ياخ وكيف الحال ..
مالم عينيك زى الماشين ؟ ..
اقعدى النستوعب جيتك ..
وأحكيلك عن كيف فى غيبتك
حتلونى كل غنواتى حنين
يازوله شفيفه بتشبهنى
محتاجك زى شحتافة الروح
أسى لو أمكن مش بعدين
يا طغص مناسب للأحلام ..
ياسلاااااااااااااام ..
ببساطه شديده بهواك ..بهواك
والهوى عامل زى العصفور
ورطنى وأسى ما قادر
وأسى مااا قادر
يا معليه بين إيدينى السور
محتاج إتلم جواى منك ..
فاضحنى هواك قدام نفسى
وأنا بيك قدام الناس مستور ..
يابت يامدهشه للآخر ..
لو تعرفى كيف أسى مبهور
يازوله جديده ومختلفه ..
زى كلمتك
أحبك بالبلدى
مكتوبه على عمدان النور
دواره كما الساقيه الأحلام
الدايرك ما دايرو ..
وداير مابيك ..
وداير الما دايرك ..
وأنا زول بهواك داير ما يدور ..
لا حولاا بتعرفى كيف حنكون ؟
متخيله حجم الدهشه معاى
وأنا أسع ياداب بحكيلك ..
خدرانه حواسى ولا خطوه
ما فتك وإحتجت أجيلك
يا أكبر حاله تمر بالبال ..
إتلمى عسى الغنوه تشيلك ..
مفتوحه دواخلى وباب الحس ..
سامعانى أكيد وأنا بشكيلك ..
محتاجك أفرح بى حرقه معاك
وأحزن لامن دمع الأفراح
إتلم بغرور فى منديلك ..
معليش طولت عليك خالص
بس أعمل إيه فى حلم الروح
البسوقنى عليك وبعاد خيلك ..أنا بحلم مش علشان القاك ؟؟؟