يابت منقرفـــــــــــه

يا بت منقرفة من هموم الدنيا والقشر اليباس

يا بت خلاص أنا جد فتر فيني الصبر

يا بت خلاص حترب مساماتي الجمر

يابت مشطفة من دموع العين وكت تبكيك فجر

يا بت خلاص ما ترجعي

و أغمس عيوني الباقة في بحرك و أعوم

كيتاً علي النجمات عشان النجمات بتضاحكن

ويتوسوسن لمان تكوني بعيدة وبشتهبك

يا بت منقرفة من هموم الدنيا والقشر اليباس

يا بت خلاص أنا يوم رحيلك شلت عكاز من صبر

سهران بحاحي الطيف قدر ما يفر بجبدو علي

أكان يطبظ عيوني الشايله منك طلة الصبحية

قبّال الشمس تتمغّى من نوما وتقوم

يا بت منقرفة من هموم الدنيا والقشر اليباس

يا بت خلاص أنا شفت قبّالك كتير لكنّو زيَك ما بجن

أيامي من غيرك سواد أيامي من دونك سكن

و انا جد سكن جواي شجن وكتين رحلتي من الوطن

يا بت خلاص ما ترجعي

يا بت خلاص انا ذاتي حاس إنو النفس مارق وراك

يا بت خلاص ما ترجعي

يا بت خلاص ما ترجعي

و أغمس عيوني الباقة في بحرك و أعوم

كيتاً علي النجمات عشان النجمات بتضاحكن

ويتوسوسن لمان تكوني بعيدة وبشتهبك

يا بت منقرفة من هموم الدنيا والقشر اليباس

حليل البدأ يامل
يوم الدنيا غشت وادتو
ساق في جواهو الفرح
وحلم بشهادة جامعتو
كان فاكر الحزن بعيد
والوجع مامن سكتو
والالم ما انكتب شانو
وبدأ يواصل مسيرتو وهمتو
بس الدنيا صحتو
وحليل الامل القبيل
يوم باع اراضيو
وكان فاكر بلقا سندو والبسندو
بس للاسف اقرب الناس جابو الالم
ناس من اهلو وشلتو
وظرفو القبيل كان حلم
والناس بتحلم وقليل البيأولو
حليل البدأ يوم يأمل
وساق السفر وساب حتتو
يادنيا سلام حزن
اصلو قليل فيك البيسعدو
وكتير الببكو وبتألمو
لا الدنيا بتدي الفرح
ولا الاقارب بريحو
واحد بكسر مقاديفك
وواحد ببيع حلمك وعليك يصعبو
وواحد ساعة الجد بكون
من الناس البهزو وبهزلو
وحبيبك او فرصة جديده
بصبح من الناس البيقدرو
ويبيعك بالرخيص شان يمشي لي غيرك
واحكي بيك ويسعدو
مدام القريب اصبح عدو
والحبيب غريب من طبعتو
ومدام في ناس ببيعو وبيشترو
وناس في الجد بهزلو
انا احسن اموت واختصر من دربي من اولو
مسكين البدأ يأمل
يوم الاحلام ذارتو
وفي نوم داك ادمدم تب
جرا ملايتو وآمالو غطتو
وفكر في التخريج
شان اساعد اهلو وحتتو
بس كان حلم طاعم
والحقيقه مسختو
والواقع في طرف السرير
والعوارض صحتو
هل ظلم نفسو بالحلم
ولا الظروف هي الظلمتو
ولا انانية الغير
من احلامو حرمتو
ولا الحياة مامن حقوقو
والموت مامن قسمتو
آه ثم آه من عواقب
ومن ناس اتخلقو شان يشمتو
مسكين البدأ يأمل
صحاو القدر شان يحزنو
ويديو جرح ومايكفلو
لا عندو ذاد للرجوع
لا ليو مكان ضمن البيخدعو
بس قرر يواصل
رقم الحساد والناس البيكبلو
ومامعروفه نهاية كفاحو وقصتو
بس قرر يواصل يكتب
ويقتال افراحو في صفحتو
ومايبكي نهائي مدام النهايات بكتو
ومايصداق غير نفسو
والكتابات الاهدتو
وقرر كمان يسيب السفر
ويهجر الناس الهدتو
مادام الناس بتخدع
شن فايده صدقو وقعدتو
وكل الحروف ساقا الموج
حبيبه حياتو هي الغرقتو
هي الباعت شوقو ومن حلمو صحتو
هي الحبيبه الالمتو وللعذاب اهدتو
وزرعت خوف الوداع
ولمت شتات احلام وحرمتو
مسكين البدأ يأمل
الدنيا غشتو
والحزن صبح رفيق دربو
والدموع بقت ملتو
حبيبتو باعتو
اهلو خانو وعليو ما اتاسفو
اكلو حقو وبيو استفرطو
حتى تعب شقاو وغربتو
وحتى بواقي سفرو ليو ماخلو
مسكين البدأ يامل
مسكين المظاهر غرتو
مسكين كل من امل والدنيا غشتو

يابت مرشوشة بي لون الحنان مكسية بي توب الدلال

انا كت بكوس لي زول يوريني الجمال

يديني من حصص الدلال

شان ابقي استاذ في الغرام

واقدر اقول انك حنان

اشتم كل ريحة النسيم الجاية من جهة الشمال

يابت مرشوشة بي لون الحنان مكسية بي توب الدلال

مخلوقة من طين الجمال

بسأل عليك كل الخلوق

لو مرة بس يدوني ضي

يابت...........