حاجه تجنن.............

حاجه تجنن

**مدخــــــــــل**
إتزكرتك
وفجأه لقيتني معاك زي سارح
وزي ماتقول كدا كت مشتاقك
وماناجيتك من أمبارح
أصلك ساعه تزعل مني
بتعمل ثوره
وفي جواي بتسوي مذابح
بس أنا عارفك لسه حنين
وقبال أطلب
بلقي عيونك لي بتسامح

**نــــــص**

قبل ماتقرر تفارق
وتمشي تبعد من وطننا
سقتها وبالشوق كسيتا
وقلت ليها وكت خايف

دفقيني عليك محنه
وختي بذره ريد صغيره
وآمني بيها
وأسقي من عينيك ترابا
بكره تكبر
وتبقي مليون ألف غابه
ماحرام لو قلنا نحلم
ونستظل عز الهجير
بي طيف سحابه
بس عيونك يوم تدمع
وإنتي تقفلي مني بابها
الدموع الفيك بتكمل
بس وحاتك
كل يوم بيمر بدونك
فيهو بتحول خرابه

وكان بتضحك...
وكنت مستغرب بعاين
ليه بتضحك!
وخوفي كان في صوتي باين
بس أكيد كانت بتضحك
شان وفيه وماحتبعد
وماها نوع الببقي خاين

وكنت وقت القاها بحلم
وبدعي ربي تكون نصيبي
وكنت بسكر بي عيونا
وديمه كان بتعدلو عيبي
وكنت بسأل نفسي مرات
ليه هي مابتقول حبيبي؟
وبرضو ماشكيت ثواني
إنو ممكن لحظه ترحل
وفي حشايا تقيد لهيبي

ومن مشت ساقت خطاها
قليبي كان في الروح بعافر
وكان هو لسه بكوس وراها
كانت متيم وأعمي ضايع
مهما شاف مابشوف سواها
وكم شهور عدت صعيبه
وزادو كان تنهيد وآهه
لحدي ما أحزانو ملت
وفي القليب أوجاعو قلت
صدفه تاني البسمه طلت
وفتحت عينيه براااها

صوتها كان بالجد يحنن
طيبه ماساقت غرورها
وكان قوام الريل يجنن
بسعد الساحات حضورها
وبالرموش كانت تنشن
وكان كما النسمات مرورها

فيني حلت
وشكلت أجمل مناظر
شالت أنقاض المآسي
وإي حس جواي مشاتر
ودون تردد
راضيه قالت بالمخاطر
جنبها الخوف ماعرفتو
ولا بتبخل بالمشاعر
غايتو كل الفيني ليها
والله سااااتر.....

عمار الزين