امتـــــــــــــــــــــــــدادك

إمتـدادك

بيويبات الفرح فاتحات في باب الضي
فلو تسمح اشيل كرسيني واتوهط قصاد عينيك
واشاغل في بنات الريد وكت مرقن عصارى الحي
واكورك في عيال الهم وكت يتجارو كوته علي
واوانسك وانت في جواي وأكد ليك إنك لي
النـص
إتمدا فوق إحساسي خوف
إتمدا قدر قدرة جفاك
انا بحملك
ضج ضجتك
كل المساحات حقتك
ماخلتك
ذات العيون الإستباحت طلتك
طله بتعشرق في حلوق البال
قدر تبلاها موية الذكرى
ترجع تاني تنشف بالحنين والفال
ده ريد بطااااااال
قدرما يهرشو محبوبو
ويقول لي بنات هواو توبو
بيعرف كيف يشق الليل
ويشوفلو طريق صباح باهت بعدل الميل
وإذا قرب الحبيب ميل
براي بقعد قصاد النيل وبتخيل
مدارات لي حبيب اوسع
بشوفك من نجوم الكون دوام ارفع
حبيب أخدع
بخادع في الشمس بالليل
عشان بكرة الصباح تطلع
شمس موزونة بي كيف ريد
على فنجان بلد اروع
مناي تطلع
على كل الحروف راجياك تزفك للقصيد مطلع
ارح اطلع
اكان غلبك قعاد جواي وخلي الروح وراك تطلع
وشن دلاك آالمريود تكوس للمرقه
وانا يوماتي ببكي عليك ويوت منحرقه
ريد امي وابوي ما اظن بسد الفرقه
نيران الغرام لسه ف حشاي منطلقه
واتمدى فوق إحساسي ضو
ابقالي عكازة ظروف اتكل عليك اوجاعي
وما من داعي
ينكسر الحنين جواك
منو الاداك حق إنك تسوقك مني بالقوه
ها بالغت ف حنينك لي
وشوف عيني
مرق منك غرام ضوا
فإيه لازمت تعاند الشوق وجواك ببكي ويتلوا
ولايوقه الحواس جواي
قدر تنهرها بتجيلك
هي ما هيلك
لزم تتمدا في جواك إذا عمر الهوان مدا
ورحيلك ما تحسبو رحيل
عشان مرات تتاوق ليا بالترحاب
واشوفك ضو سقط بالغفلة من كوا
رحيلك كيف تحسبو رحيل
وانحنا إذا إفترقنا سنين
جواي بنكون دوام سوا