شكرا جزيلا يا وهم

شكراً جزيلاً يا وهم

شكرا" جزيلا" ياوهم
ماتهبش الجرح النزيف
ولساتو لاطاب لا إلتئم
ولساي شاقه غناي نحيب
لسايا بتقطع ألم
وكل ماعصرني حنين إليك
ببكيك في جوايا دم
ماجهجهني دروب جفاك
ماشاك لي درب إنعدم
وانا كنت صادقة عشان هواي
ومازارني إحساس بالندم
بالعكس رافعاك بإعتزاز
نارا" مولعة فوق علم
وانا بستميحك أنزلك
وأدوس عليك
وقدام عينك
أحرق بواقي الريدة كان دار تحتويك
إنعل أبوك ياشوق أكان يوم فت ليو
وإنعل أبوك ياعشرة ماهانت عليو
وانعل أبوك ياذكرى
كل ما أجرجرك لي بكره
تنسرقي وتجيو
شكرا" جزيلا" ياوهم
بفرز على قدر التوجس
فكرة لي حس مامصيب
وما بفتعل من مافي
إحساس دافي
أسميو الحبيب
أنا فكرة لي منطق معين
بلغي فكرة قديمة
وإستسلام لزل وهزيمة
أو قسمة ونصيب
شان إنت تتوالف معاك
وأنا برتجف
من أوهى خيط
خايفاهو يطلع لي دبيب
وأنا مابخيب ...
لو خابن الآمال جواي
وفتر غناي
شان دوزنك للدنيا نغمة
في عود صدق
شكرا" جزيلا" ياوهم
الزرع قام
يابس كأنو هو ما إتروى
وضميرنا في هادا الزمان
مرضان ومعدوم الدوا
جاط النظام
والأمن لساو مسستتب
ثورات تقوم من دون فرض
ثورات تهز باقي الأرض
ووطاتنا با الطول والعرض
مافيها زول دار إعترض
وأنا هسه بمرق وبعترض
أنا بعترض
لومرة والد فات صغار
شان الكبار
إتقاسمو العرق النضيف
وبقى حملو حار
قام شافلو صرفة من الهموم
من مايموت بالإنتحار
وأهو نحنا في نص النهار
عز المواقف وزحمته
بنوت صغار بجرن وراك
والحالة شدت أزمته
وأنا شفت بنوت الكبار
الواحدة يوم تبراها بت
بتدوس عليها بجزمته
فإلى متى
وكل الحروف ركنت جواي
مالاقية بالخوف أزمته
وشكرا" جزيلا " ياوهم
السمحة قدلت في العيون
وكان خانك الإحساس جواك
خليو عشان خاطرك يخون
وأنا من فقدتك ياوطن
ماهمني الكان والبكون
وأنا قت ليك ...
مهما" تعتمك الضروح
وتنزفك ظلم الجروح
أوعاك تخاف
الضلمة مارمز الكفاف
ماتغرك أمطار الخريف
وأعمل حسابك لو يجيك
فجأة الجفاف
شكرا" جزيلا" ياوهم
وأنا ما إمعه
لكني في لحظت وعه
يا اكون براي ...
يا اكون معه
وكلماتي لومرقن صدق
ماف زول بيسكت ويسمعه
غصة حقايق في الحلق
بالخوف ولاقادرة أبلعه
أنكرني قبال تحتكر
باقي المشاعر وتخدعه
أنكرني ياتلج القصيد
وأنضم قصيدة مولعه
وسوحني جواك بإحترام
ماضي لمآسي مروعه
وشكرا" جزيلا" ياوهم