هل من مزيد..............

هل من مزيد ؟؟؟...


ضد إئتلاف الفكرة والصوت والجسد ..
شهق الحنين احد احد ..
تاور ضجيج الامنيات جواي ولزمني اللحد ..
وبكيت علي
حد ما الدموع إتيبسن
سجيل بينزل في القلب .
وده ماذنب .
لو كل زول في الدنيا باع إحساسو للناس بالكضب .
وده ماذنب .
تخلص تحب .
لي زول مجهجه ومضطرب .
ما الدنيا معركة وإنهزام ..
إيه يعني لو دكيت حصون الريده واعلنت الخصام ..
ماشفت زول ميت بموت ولا ميت إتنفض وقام ..
وده ما إحترام ..
وإيدك مطرفة في السلام ..
آزول سلام ..
الوجعة نخرت كل حواس الريدة وصلت للعضام ..
إذن إنتباه .
لوسقت تيارك مشيت عكس المياه .
عاين قصاد شمس الشروق ضلك وراك مابشبهك ...
إذن إنت اتنين في بعض
واحد ممردغ في تراب الذكرى
ضد الفكره
ضد الإنفصال
واحد بعاين من بعيد مابهزو شي .
بضحك مع الناس منتشى .
مع إنو كل البيهو باين في وشي .
إتنين وراك ..
ضد محتواك ..
ماف زول لحدي الليلة إتواضع لقاك ..
آزول كفاك ..
اقعد وكت غلبك مشيك ما السكة دايرة صبر طويل
وصبرك مشحتف وكلو خوف .
ودي ما الظروف .
الجهجهت نزف الحروف .
ودي ما الظروف .
العمت إحساس الغرام مع إنو عاقل وكلو شوف .
ودك ياوجع
دك ياغرام
يا اهة دك
شكو المضامين من جديد ..
انا ماكتبت عشان ابرد حرقة الجوف بالقصيد ..
ما البي اكبر من تسربل ريدة في عمق الوريد ..
انا نار غرام اديني من حطب الجفا بتلقاني قت هل من مزيد ؟ ...
هل من مزيد ؟ ...
اطفال شوارع بإنتظام .
مرمية في اوكار ضلام .
واللقمة بس للمستطيع ..
المستطيع اليه في شان نحيا بالزلة بنطيع ..
هل من مزيد ؟ ...
اطفال بيوت .
سترة وستوت .
عرقي ورقيص
بالقرمصيص
الام مرصعة جيدة في هيبة وجمال
ماتوا الرجال
رخو الحبال
القيل وقال
والعفة في السوق بالرخيص
هل من مزيد ؟ ...
شاي الصباح
الشاي نقص ..
والجوع مقص ..
والهم بمص في دمانا مص ..
نطلع نخيل الأمنيات نلقى التمر في علاهو فص ..
هل من مزيد ؟ ...
صبر انعكس ..
هم وانتكس ..
مخنوقة كل الامنيات كايسة النفس ..





ايمان متوكل