جمبك معاك ومشتهيك

جمبك معاك كيف ياحنين
جوك اكيد ماناقصو شي
جواك حنان عاجبني فيك
جوالي فيك ما خلي شي
جوال معاك روحه وحضور 
جواب هواك خلاني حي
جواب عليك في كل سؤال
ساال عن الحال رد لي
سواك رب الكون ملاك
سلاكا كيف في الدنيا دي
مستغرب القاك في زمن
مافيهو زول كان حاسي بي
قمرا علي صفح السحاب
صفحات كتاب كاتباو ادي
قلبا موشح بالحنان
فنان وصاب سهمك عني
عيان من الريد والهيام
وانت الطبيب طبطب علي
طيب وطيب راحتك دواي
رايح وضايع فيكا صي
صياد وماهر في القلوب
قلاب هواك ماخلا شي
في الريد بدفق والغرام
قرام في قلبي ولسه حي
حياكا رب القدره دوم
حياكا خلاك انت لي
لواي هواك كيف في البطن
وبطان كلامي انا شايفو ني
لا بقدر يوفيك الوصف
لا يخفف الحال ياجني
سقطان وحران في حداك
سهران ونعسان كم وكي
هيمان وولهان ياغزال
غيران وحيران ياجدي
سجمان ورمدان في العشق
جمدان وغليان حن علي
معطون ومبلول في هواك
معيون ومسحور رد لي
خاتيكا في جواي زمن
من كان نخل عشقك نوي
أشهقني في جواك أمان 
واديني من حبك هوي
ساسق بي في حدود الغرام
مادام مُدام ريدك شوي
انا فيك مستف للسفر
مرصوص مرتب من عشي
وكبرت في قربك سنين
لكنو حال الريد صبي